|
|
|
Usa se non visualizzi |
Profumi di sicilia
Non parru di l'aranci e mannarini
ca dùnunu a 'sta terra tantu oduri,
li zàghiri sbucciati e gelsumini
ccu tutti li prufumi di li ciuri
Vogghiu parrari di l'antichitati
ca si faceva l'oriu atturratu
lu prufumu ca c'era nta li strati
era di lu cafè lu surrugatu
Marmillata di pruna e di cirasi,
crispeddi fatti 'i risu ccu lu meli,
chi ciàuru nisceva di li casi
di mènnuli atturrati e carameli
MastazzuIeddi ccu lu vinu cottu,
carrubbi 'nto casciolu e li cutugna,
lu vicchiareddu si sintìa picciottu
ca li manciava e s'alliccava l'ugna
Mustardi ccu la pàssula siccata,
chi tràficu ca c'era a la vigilia
nta ogni casa c'era tavulata
ccu 'sti beddi prufumi di Sicilia.
(proposta da Mario Iurzan)
Questo brano e' tratto dal libro "Sonni e ricordi di la vita mia - Liriche dialettali siciliane" scritto da "Alfio Naso", stampato dalla tipografia Gullotta di Catania. Non e' intenzione dell'autore violare i diritti di copyright. Se l'autore del libro volesse cancellare la pubblicazione e' pregato di inviare una e-mail e l'articolo sarà tolto entro 48 ore
|
|
|
Usa se non visualizzi |
